ხშირად დასმული კითხვები

  • საექთნო გადამზადების რა კურსები გაქვთ და რა ხანგრძლივობის?
    კორპორაცია „პარტნიორები საერთაშორისო განვითარებისათვის“ საქართველოს წარმომადგენლობა ემორის უნივერსიტეტთან (აშშ, ატლანტა) ერთობლივი სასერთიფიკატო სახელობო საექთნო სასწავლო პროგრამის ფარგლებში დიპლომირებულ ექთნებს და ექთნის დამხმარეებს გთავაზობთ მოკლევადიან საგანამანათლებლო პროგრამებს, ზოგად საექთნო და სხვადასხვა მიმართულების სასერთიფიკატო კურსებს როგორც თბილისის მასშტაბით, ისე რეგიონებში:
    • ზოგადი საექთნო კურსი - 20 დღე
    • პედიატრიული განყოფილების ექთნის ზოგადი კურსი - 20 დღე
    • გადაუდებელი მედიცინის განყოფილების ექთნის კურსი - 10 დღე (ზოგადის გავლის შემდეგ)
    • ზოგადი ქირურგიული განყოფილების ექთნის კურსი - 10 დღე (ზოგადის გავლის შემდეგ)
    • კრიტიკული მედიცინის განყოფილების ექთნის კურსი - 10 დღე (ზოგადის გავლის შემდეგ)
    • სამეანო განყოფილების ექთნის კურსი - 10 დღე (ზოგადის გავლის შემდეგ)
    • ამბულატორიის ექთნის კურსი - 20 დღე
    • სასტერილიზაციოს ექთნის კურსი - 2 დღე
    • სინთეზური კურსი (ზოგად კურსთან ერთად სპეციალიზაციის კურსი) – 20 დღე
  • როგორ დავრეგისტრირდე საექთნო სასერთიფიკატო კურსებზე?
    იმისათვის, რომ გაიაროთ საექთნო სასერთიფიკატო კურს(ებ)ი, აუცილებლად უნდა გქონდეთ პროფესიული განათლების დამადასტურებელი დოკუმენტი, ექთნის, ექთნის დამხმარის ან სამედიცინო უნივერსიტეტის დიპლომი. მოგეხსენებათ, საექთნო პროფესია რეგულირებადია, რაც ნიშნავს იმას, რომ ექთანი ვერ გახდებით მხოლოდ სერთიფიცირებით. დიპლომისშემდგომი განათლება ხელს უწყობს აპლიკანტის პროფესიულ განვითარებასა და კარიერულ ზრდას. რეგისტრაციისთვის დაგვიკავშირდით შემდეგ ნომრებზე: 032 274 74 08; 591 900 228; 599 243 242; 593 51 55 32 ან მოგვწერეთ სოციალური ქსელის ოფიციალურ გვერდზე PFID/Facebook .
  • რეგიონებში ექთნებს ამზადებთ?
    რეგიონებში მოქმედი კლინიკების მოთხოვნით კორპორაცია ახორციელებს ექთნების ადგილზე გადამზადების პროგრამებს, რომელიც, შესაძლებელია როგორც ჩვენი კორპორაციის და ემორის უნივერსიტეტის ერთობლივი სასწავლო პროგრამის, ისე კლინიკის მოთხოვნების შესაბამისად ჩვენ მიერ შემუშავებული სასწავლო გეგმის მიხედვით.
  • ექთნებს ან ექთნის დამხმარეებს ასაქმებთ?
    PFID-ის სასერთიფიკატო პროგრამ(ებ)ის გავლის შემდეგ თქვენი მონაცემები და განვლილი კურსის ფინალური შედეგები რჩება ჩვენს ელექტრონულ ბაზაში. პარტნიორი კლინიკები ხშირად გვთხოვენ, მაღალკვალიფიციური ექთნები ან ექთნის დამხმარეები მოვუძებნოთ. ჩვენ ვუწევთ რეკომენდაციას ჩვენს წარმატებულ, მაგრამ დაუსაქმებელ ექთნებს და ვეხმარებით მათ დასაქმებაში. კორპორაციის შუამდგომლობით დასაქმებული ექთნები წარმატებით იკავებენ პოზიციებს საქართველოს სხვადასხვა სამედიცინო დაწესებულებებში, არაერთი მათგანი სხვადასხვა კლინიკის მთავარი ექთანია.
  • თქვენი სერთიფიკატით დავსაქმდები?
    იქიდან გამომდინარე, რომ საქართველოში საექთნო საგანმანათლებლო დიპლომისშემდგომი პროგრამები ჩვენი წამოწყებულია, კორპორაციას - „პარტნიორები საერთაშორისო განვითარებისათვის” საქართველოს სამედიცინო და საგანმანათლებლო დაწესებულებებში კარგად იცნობენ. კორპორაციას გააჩნია შეუბღალავი რეპუტაცია და სარგებლობს მაღალი სანდოობით. შესაბამისად, ჩვენ მიერ გაცემული სერთიფიკატი (გაიცემა მხოლოდ კურსის წარმატებით დასრულების შემთხვევაში) გეხმარებათ კარიერულ წინსვლაში. თუმცა, არ უნდა დაგავიწყდეთ ისიც, რომ თუ განვითარება და კარიერული ზრდა გსურთ, დიპლომისშემდგომ განათლებაზე მუდმივი ზრუნვა თქვენი ვალდებულებაა. სერთიფიცირების კურსების განმეორებით გავლა არასდროსაა ზედმეტი მით უფრო, სამედიცინო სფეროში, რომელიც მუდმივად ვითარდება ახალახალი ინსტრუქციებითა და გაიდლაინებით. ჩვენი გუნდი ამერიკელ პარტნიორებთან ერთად ორიენტირებულია, სასწავლო პროგრამების მუდმივ განახლებაზე.
  • მაღალმთიან რეგიონებში მცხოვრებ ან სოციალურად დაუცველი მოქალაქის სტატუსის მქონე დიპლომირებულ ექთნებს აფინანსებთ?
    მაღალმთიან რეგიონებში მცხოვრები, სოციალურად დაუცველი და იძულებით გადაადგილებული პირების სტატუსის მქონე ექთნებისთვის და ექთნის დამხმარეებისთვის მოქმედებს სასერთიფიკატო კურსების ნაწილობრივი დაფინანსება.
  • სად მდებარეობს თქვენი საექთნო კოლეჯი?
    „ქართულ-ამერიკული საექთნო საზოგადოებრივი კოლეჯი” მდებარეობს თბილისში, ქეთევან წამებულის გამზირზე, #65-ში, კორპორაცია PFID-ის ბაზაზე.
  • არის თუ არა კოლეჯი ავტორიზებული?
    „ქართულ ამერიკული საექთნო საზოგადოებრივი კოლეჯი” გახლავთ განათლების სამინისტროს სსიპ განათლების ხარისხის განვითარების ცენტრის მიერ ავტორიზებული პროფესიული სასწავლებელი, რომლის დასრულების შემდეგ სტუდენტს გადაეცემა მეხუთე საფეხურის საგანმანათლებლო პროგრამის, ექთნის, დიპლომი.
  • რა პროფესიებს მოიცავს კოლეჯი?
    შესაძლებელია მხოლოდ საექთნო განათლების მიღება.
  • რა პერიოდს მოიცავს სრული სასწავლო საექთნო კურსი?
    სრული სასწავლო საექთნო განათლება პროფესიულ კოლეჯში მოიცავს 3 წელიწადს.
  • შესაძლებელია თუ არა სახელმწიფო გრანტის მოპოვება?
    სახელმწიფო დაფინანსების მოპოვება შესაძლებელია. მსურველებმა უნდა ჩააბარონ სახელმწიფო დაფინანსების გამოცდები.
  • რა სახით ტარდება სახელმწიფო დაფინანსების მსურველტა გამოცდები და რა საგნების ჩაბარებაა საჭირო გრანტის მოსაპოვებლად?
    სახელმწიფო გრანტის მოპოვების მსურველი აპლიკანტები უნდა დარეგისტრირდნენ საიტზე www.vet.emis.ge , სადაც მითითებული იქნება პროფესიული ტესტირების გამოცდის თარიღი, დრო და ადგილი. გამოცდები ტარდება როგორც საბუნებისმეტყველო საგნებში (ფიზიკა, ქიმია, ბიოლოგია), ისე - ზოგად უნარებში. დაწესებული ბარიერის გადალახვის შემთხვევაში, აპლიკანტს სწავლა ჩვენს კოლეჯში სრულად (3 წლის განმავლობაში) უფინანსდება.
  • თუ ვერ მოიპოვა აპლიკანტმა სახელმწიფო დაფინანსება, როგორ შეიძლება, ჩააბაროს კოლეჯში?
    თუ აპლიკანტმა ვერ მოიპოვა სახელმწიფო დაფინანსება, შეუძლია კოლეჯში გასაუბრების ან შიდაგამოცდის საფუძველზე დაიწყოს სწავლა. ამ შემთხვევაში სწავლა არის ფასიანი.
  • რამდენია სწავლის საფასური?
    კოლეჯში სწავლის საფასური წელიწადში შეადგენს 2000 ლარს. გადახდა შესაძლებელია როგორც ერთიანი დაფარვით, ისე - ეტაპობრივად სტუდენტსა და კოლეჯს შორის დადებულ ხელშეკრულებაში მითითებული თვეების მიხედვით (გადასახადის გადანაწილება ხდება ინდივიდუალურად).
  • არის თუ არა შესაძლებელი 9 კლასის დასრულების შემდეგ კოლეჯში სწავლის გაგრძელება?
    „ქართულ-ამერიკულ საექთნო საზოგადოებრივ კოლეჯში” სწავლის მსურველმა აპლიკანტმა ერთ-ერთ აუცილებელ დოკუმენტად უნდა წარმოადგინოს სრული საშუალო განათლების ატესტატი, რომელიც გულისხმობს 11 ან 12 კლასის ატესტატს (დამოკიდებულია, რომელ წელს გაქვთ დამთავრებული სრული საშუალო განათლების მიღება).
  • როგორია სწავლის განრიგი?
    სწავლის განრიგი დამოკიდებულია არჩეული საგნების რაოდენობაზე. ჩვენს სტუდენტებს ლექციები უტარდებათ ყოველდღე.
  • დაფინანსების მსურველთათვის გამოცდების წარმატებით გავლის შემდეგ, როდის იწყება რეგისტრაცია და რა სახის დოკუმენტების წარდგენაა საჭირო?
    იმისათვის, რომ გახდეთ „ქართულ-ამერიკული საექთნო საზოგადოებრივი კოლეჯის” სტუდენტი, აუცილებელია, რეგისტრაცია გაიაროთ სახელმწიფო დაფინანსების გამოცდებამდე, რათა განვსაზღვროთ ადგილების რაოდენობა სახელმწიფო გამოცდების გზით მისაღები კონტინგენტისთვის. ადგილების არსებობის შემთხვევაში, რეგისტრაცია შესაძლებელია სახელმწიფო გამოცდების შემდგომაც. რეგისტრაცია შესაძლებელია როგორც ონლაინ, ისე ადგილზე. ჩარიცხვის მსურველმა აპლიკანტმა აუცილებელად უნდა წარმოადგინოს შემდეგი დოკუმენტებია: პირადობის მოწმობის ასლი, ატესტატის ასლი, 2 ფოტოსურათი 3/4 ამობეჭდილი და ასევე, ჩაწერილი კომპაქტურ დისკზე, მოკლე რეზიუმე (CV).
  • სწავლის პარალელურად შესაძლებელია თუ არა პრაქტიკული ცოდნის მიღება?
    სასწავლო პროცესი მოიცავს, რა თქმა უნდა, პრაქტიკულ ნაწილსაც, როგორც ადგილზე - სიმულაციური ბაზის და მაღალტექნოლოგიური მულაჟების (მანიკენების) გამოყენებით, ისე ჩვენს კლინიკურ ბაზაზე მოქმედ კლინიკებში კოლეჯის კლინიკური მასწავლებლის ზედამხედველობითა და ჩართულობით.
  • შესაძლებელია თუ არა ქართულ-ამერიკული საექთნო საზოგადოებრივ კოლეჯში მობილობით გადმოსვლ და რა პროცედურებია ამისთვის საჭირო?
    იმისათვის რომ კოლეჯში სტუდენტი გადმოვიდეს მობილობით, აუცილებელია იგი სწავლობდეს იგივე სპეციალობაზე სხვა პროფესიულ სასწავლებელში. მობილობა შესაძლებელია შემოდგომისა და გაზაფხულის სემესტრებში. მსურველი უნდა დარეგისტრირდეს ელექტრონულ პორტალზე www.students.emis.ge, შეავსოს განაცხადი, გადაიხადოს მობილობისთვის განკუთვნილი თანხა (40 ლარი) და დაელოდოს შედეგებს.
  • სოციალურად დაუცველებზე რაიმე სახის დაფინანსება თუ მოქმედებს?
    სოციალურად დაუცველის სტატუსის მქონე პირებმა გამგეობაში უნდა წარადგინოთ ცნობა ჩვენი კოლეჯიდან, რის შემდეგაც გამგეობა მიიღებს გადაწყვეტილებას თქვენი სწავლის დაფინანსების შესახებ.
  • კოლეჯში საექთნო პროფესიულ სწავლებაზე არის თუ არა ასაკობრივი შეზღუდვა?
    ასაკობრივი შეზღუდვა არ არის, კოლეჯში სწავლა შეუძლია ნებისმიერი ასაკის მსურველს, ვისაც აქვს საშუალო საბაზისო განათლება.
  • კოლეჯში საექთნო პროფესიის დაუფლება, მხოლოდ ქალბატონებს შეუძლიათ თუ მამაკაცების მიღებაც შესაძლებელია?
    რა თქმა უნდა, საექთნო პროფესიის დაუფლება შეუძლიათ როგორც ქალბატონებს, ისე მამაკაცებსაც, გვყავს ორივე სქესის წარმომადგენლები.
  • კოლეჯში სწავლის მსურველი თუ იმყოფება ქვეყნის გარეთ, აქვს თუ არა შესაძლებლობა ჩააბაროს კოლეჯში და ისწავლოს დაუსწრებლად, ონლაინ პლატფორმის საშუალებით?
    საექთნო პროფესიული სწავლება მოიცავს პრაქტიკულ ნაწილსაც, აქედან გამომდინარე დაუსწრებლად სწავლა შეუძლებელია, იმისათვის რომ გახდეთ სრულფასოვანი ექთანი, აუცილებელია ლექციებსა და პრაქტიკულ მეცადინეობებზე დასწრება.